Elçin Zahid oğlu Nadirov 1963-cü ildə anadan olmuşdur.

Bakı Dövlət Universitetinin hüquq fakültəsini bitirmişdir.

1995-1997-ci illərdə Azərbaycan Respublikası Vəkillər Kollegiyasının üzvü kimi fəaliyyət göstərmişdir.

1997-2006-cı illərdə əvvəlcə Azərbaycan Respublikasinin Ticarət Nazirliyində, sonradan isə Dövlət Əmlakı Nazirliyində və İqtisadi İnkişaf Nazirliyində hüquq departamentinin direktoru vəzifəsində işləmişdir.

E.Nadirov iqtisadi münasibətlərin tənzimlənməsi sahəsində bir çox qanunvericilik aktlarının işlənib hazırlanmasında, o cümlədən idxal-ixrac əməliyyatlarının tənzimlənməsi, Azərbaycanın Ümumdünya Ticarət Təşkilatına qoşulması istiqamətində həyata keçirilən tədbirlərdə, ölkə vətəndaşları üçün pasportların işlənib hazırlanması prosesində yaxından iştirak etmişdir.

Bir sıra təcrübəli mütəxəssislərlə yanaşı E.Nadirovun iştirakı ilə dövlət əmlakının özəlləşdirilməsinin ikinci mərhələsini tənzimləyən qanunvericilik toplusu işlənib hazırlanmışdır.

E.Nadirov dövlət qulluğunda çalışdığı dövrdə mühüm dövlət tədbirlərinin hazırlanmasında və keçirilməsində iştirak etmiş, iqtisadi sahədə əməkdaşlıq üzrə bir sıra dövlətlərarası komissiyaların üzvü kimi xarici səfərlərdə olmuş, işçi qruplarına rəhbərlik etmiş və müxtəlif dövlətlərarası danışıqların yekunu kimi qəbul olunmuş sənədlərin hazırlanmasında yaxından iştirak etmişdir.